Часам здараецца так, што, пражыўшы шмат жыццяў у барацьбе і пагоні за пачуццёвымі задавальненнямі, чалавек пачынае адчуваць нейкую агіду да такой дзейнасці. Наеўся, як кажуць. Аж да ванітаў)

І вось у гэты момант Крышна прыводзіць такога чалавека да шляху г’яны.

Што ўяўляе сабой гэтая практыка? Па-першае, гэта аналіз навакольнага свету з дапамогай логікі, назіранняў і святых пісанняў. Чалавек утрымлівае свае пачуцці ад кантакту з аб’ектамі пачуццёвай асалоды. Упарадкоўвае ежу і сон, ня мае пазашлюбных зносінаў альбо ўвогуле трымаецца цэлібату. Звычайна такі чалавек жыве дзесьці ў самотным месцы і медытуе на адзіны Брахман. Прыкладна так: а-у-м....;)

Часта такіх людзей яшчэ называюць імперсаналістамі. То бок, яны лічаць, што Абсалютная Ісціна ня ёсць асобай (персонай), а ўся разнастайнасць матэрыяльнага свету (як і сам свет) часовая і ілюзорная. І самае галоўнае – імперсаналіст шчыра лічыць, што ён і ёсць Абсалютная Ісціна, таксама як і ўсе астатнія. Усё ёсць Брахман, don’t worry be happy:)

Шлях г’яна-ёгі – гэта адрачэнне ад матэрыяльнага свету і імкненне да вызвалення (растварэнне ў Брахмане).

Але ня ўсё так проста. На кожным шляху ёсць свае складанасці і перашкоды. Увесь час кантраляваць свае пачуцці вельмі цяжка, бо па сваёй прыродзе яны вельмі актыўныя. Больш за тое, душа таксама дзейная. Таму вынікам нават невялікага паслаблення кантролю пачуццяў і розуму будзе неадкладнае падзенне. Такім чынам, душа, не атрымаўшы поўнага задавальнення ад зліцця з Абсалютам, зноў вяртаецца ў матэрыяльны свет, і так у чарговы раз пачынаецца ейная дабрачынная альбо якая іншая дзейнасць. Кармічнае кола замкнулася...