У Врындаване ўсе чыстыя адданыя моляць аб літасці Шрымаці Радхарані, энергіі асалоды Госпада Крышны. Шрымаці Радхарані – гэта другі, мяккасардэчны жаночы бок поўнага цэлага, дасканаласць і само ўвасабленне жаноцкасці. Таму Радхарані заўсёды ахвотна адорвае Сваёю ласкаю шчырых адданых, і калі Яна зверне ўвагу Госпада Крышны на такога адданага, Госпад неадкладна прыме яго ў Сваё атачэнне.
Уся слава Радхарані! Яна вельмі дарагая Крышну. Усе хочуць любіць Крышну, але Крышна хоча любіць толькі Радху. Толькі ўявіце сабе ўсю Ейную веліч! Крышна-прэма такая бясцэнная, але Крышна ідзе ўслед за Радхарані. Паспрабуйце зразумець Радхарані. Яна такая вялікая. Мы павінны ўшаноўваць Яе. Радха – найпрыгажэйшая з усіх дзяўчат. Яна заўсёды так цудоўна апранаецца, што прываблівае Дамадару Сваім хараством. Калі вы паедзеце ў Врындаван, то ўбачыце, што ўсе пакланяюцца Радхарані. Усе адданыя Врындавана пакланяюцца Радхарані. Чыстыя адданыя моляцца Радхарані: «О Радхарані, Ты такая літасцівая. Я прашу Твае літасці».
Радхарані – Хары-прыя, вельмі дарагая Крышну. Калі вы звяртаецеся да Крышны праз Радхарані, з Ейнае ласкі гэта станецца вельмі лёгкім. Калі Радхарані парэкамендуе вас: «Гэта добры адданы», тады Крышна неадкладна пагодзіцца прыняць вас, нават калі вы самы апошні дурань. Таму ў Врындаване ўсе адданыя больш паўтараюць імя Радхарані, чым імя Крышны. Куды б вы ні адправіліся ў Врындаване, паўсюль вы знойдзеце адданых, якія вітаюць адно аднаго: «Джая Радхе!» Яны славяць Радхарані. Яны больш зацікаўленыя ў пакланенні Радхарані. Якім бы ні быў я палым, калі так ці інакш я задаволю Радхарані, я лёгка магу зразумець Крышну.
Выконваць адданае служэнне азначае ісці слядамі Радхарані, і адданы ў Врындаване, дзеля таго, каб дасягнуць дасканаласці ў адданым служэнні, аддае сябе пад апеку Радхарані. Іншымі словамі, адданае служэнне не ёсць дзейнасцю гэтага матэрыяльнага свету, яно знаходзіцца наўпроста пад кантролем Радхарані.
На караблі «Джаладута» Шрыла Прабхупада напісаў Малітву лотасавым стопам Госпада Крышны. Прыпеў гэтага бхаджана гучыць так: «О браты! Сапраўды кажу вам: Госпад Крышна разліе на вас Сваю ласку толькі тады, калі Шрымаці Радхарані будзе задаволеная вамі».
У «Гітавалі» Бхакцівінода Тхакура ёсць такія словы: «Той, хто не можа пакланяцца лотасавым стопам Шры Радхікі, крыніцы ўсяго спрыяльнага; той, хто не можа знайсці прыстанне ў трансцэндэнтным свяцілішчы Врындавана, упрыгожаным лотасападобным імем Радхі; той, хто не мае стасункаў з адданымі Радхікі, сэрцы якіх споўненыя мудрасці і любові Радхікі – як такі чалавек зможа калі-небудзь нацешыцца амавеннем у акіяне густаў адданага служэння Госпаду Ш’ямасундару?
Паспрабуйце зразумець, што Шры Радхіка – гэта настаўніца мадхур’я-расы (густу шлюбнае любові). Мадхур’я-прэма Радха-Мадхавы прызначаная для абмеркавання і медытацыі. Той, хто цешыцца лотасавымі стопамі Шрымаці Радхарані, знаходзіць лотасавыя стопы Мадхавы, бясцэннага скарбу сярод усіх скарбаў. Не прыняўшы прыстанне лотасавых стопаў Радхі, адданы ніколі не сустрэне Крышну. Ведыйскія пісьмы сцвярджаюць, што Крышна належыць прыслужніцам Шры Радхі. Пакінь жонку, сыноў, сяброў, багацце, паслядоўнікаў, спекулятыўныя веды і матэрыялістычную дзейнасць. Проста сканцэнтруйся на салодкім служэнні лотасавым стопам Шрымаці Радхарані. Такая адзіная просьба Бхакцівіноды».