Знакамітая Шыкшаштака – Восем вершаў-малітваў, якія пакінуў пасля сябе Госпад Чайтанья. Гэтыя восем невялікіх тэкстаў змяшчаюць усю паўнату трансцэндэнтнага ведання.
1. Слава санкіртане Шры Крышны, якая ачышчае сэрца ад пылу, назапашанага за доўгія гады, і тушыць пажар абумоўленага жыцця, паўторных нараджэнняў і смерцяў. Рух санкіртаны – найвышэйшае багаславенне ўсяму чалавецтву, бо ён распаўсюджвае промні месяца багаславення. У ім – душа ўсіх трансцэндэнтных ведаў. Ён павялічвае акіян трансцэндэнтнае асалоды і дае нам мажлівасць у поўнай меры нацешыцца смакам нектару, якога мы заўсёды так прагнем.
2. О мой Госпад, адно Тваё святое імя здольнае дараваць багаславенне ўсім жывым істотам, а ў Цябе сотні і мільёны такіх імёнаў, як Крышна і Гoвінда. У гэтыя трансцэндэнтныя імёны Ты ўклаў усе Свае трансцэндэнтныя энергіі, і няма нават строгіх правілаў спеву Тваіх імёнаў. О мой Госпад, з ласкі Сваёй Ты даў нам мажлівасць лёгка наблізіцца да Цябе, спяваючы Твае святыя імёны, але я такі няўдачлівы, што не адчуваю цягі да іх.
3. Спяваць святое імя Госпада трэба ў пакорлівым стане розуму, лічачы сябе ніжэй за салому, што ляжыць на дварэ. Трэба стаць цярплівей дрэва, вызваліцца ад пачуцця ілжывага прэстыжу і быць гатовым выказаць павагу іншым. У такім стане розуму можна спяваць святое імя Госпада ўвесь час.
4. О Усёмагутны Госпад, я не хачу збіраць багацці, мне не трэба ні прыгожых жанчын, ні паслядоўнікаў. Я хачу толькі аднаго – беспрычыннага адданага служэння Табе, жыццё за жыццём.
5. О сын Mахараджы Нанды (Крышна), я Твой вечны слуга, але так ужо здарылася, што я ўпаў у акіян нарадзінаў і смерці. Прашу Цябе, вызвалі мяне з гэтага акіяна смерці, і хай я буду адным з атамаў ля Тваіх лотасавых стоп.
6. О мой Госпад, калі ж вочы мае ўпрыгожацца слязьмі любові, што няспынна льюцца пры спеве Твайго святога імя? Калі ж задрыжыць мой голас і валасы на целе ўстануць дыбам пры паўтарэнні Твайго імя?
7. О Говінда! Кожнае імгненне расстання з Табою для мяне доўжыцца даўжэй за дванаццаць гадоў. Слёзы льюцца з вачэй маіх, як стромні дажджу, і без Цябе ўвесь свет здаецца мне пустым.
8. Для мяне няма іншага Госпада, апроч Крышны, і Ён застанецца Ім, нават калі, абдымаючы мяне, Ён будзе грубым са мною ці разаб’е маё сэрца, не з’яўляючыся перада мною. Ён вольны рабіць усё, што пажадае, бо Ён – мой Госпад, якому я пакланяюся, і застанецца Ім назаўжды.