Дзень з’яўлення Шрымаці Сіта Дэві

16 траўня 2024

Роўна праз месяц пасля з’яўлення Шры Рамы адзначаецца дзень з’яўлення Ягонай жонкі, багіні Сіты, увасаблення самой Багіні Лакшмі!

Гэты дзень таксама вядомы як Сіта Навамі і Сіта Джаянці.

З’яўленне багіні Сіты адзначаецца ў Навамі Цітхі падчас Гаўра Пакшы (дзявятыя суткі росту Месяца) месяца Мадхусудан (Вайшакха). Сіта Дэві, увасабленне багіні ўдачы, Лакшмі Дэві, ёсць вечнай жонкай Госпада Рамачандры.

У легендарным эпасе «Рамаяна» расказваецца гісторыя жыцця і дзеяў Госпада Рамы, але не толькі Яго самога, а ў цесным звязку з Ягонай адзінай вернай пабожнай жонкай Сітай. Па ведыйскіх канонах Шрымаці Сіта Дэві ўважаецца за ўзор цнатлівай, вернай, мудрай жонкі. Замужнія жанчыны трымаюцца посту ў дзень Сіта Навамі і моляцца, каб дамагчыся доўгага жыцця сваіх мужоў.

Шрымаці Сіта Дэві таксама вядомая як Джанакі, бо яна была прыёмнай дачкой караля Джанакі з Мітхілы. Таму гэты дзень таксама вядомы як Джанакі Навамі. Паводле індыйскай міфалогіі, калі кароль Джанака араў зямлю, каб здзейсніць яг’ю, ён знайшоў у залатой шкатулцы дзяўчынку. Узараная зямля называецца Сіта, і таму кароль Джанака назваў дзяўчынку Сітай.

Джай Шры Сіта Рам!!!