У гэтым вершы Арджуна названы Гудакешам. Гудака значыць «сон», а гудакеша «той, хто перамог сон». Пад сном часам маецца на ўвазе невуцтва. Інакш кажучы, дзякуючы свайму сяброўству з Крышнам Арджуна змог адолець і сон, і невуцтва. Будучы вялікім адданым Крышны, ён ні на імгненьне не забываў Яго, бо адданыя ня могуць інакш. Наяве або ў сьне, адданыя няспынна думаюць пра імя Крышны, Ягоны вобраз, Ягоныя якасьці й боскія гульні. І дзякуючы таму, што адданы заўсёды думае пра Крышну яму ўдаецца перамагчы сон і невуцтва. Такі стан называюць сьвядомасьцю Крышны або самадхі. Зьяўляючыся Хрышыкешам, уладаром пачуцьцяў і вума ўсіх жывых істотаў, Крышна ведаў, чаму Арджуна папрасіў Яго паставіць калясьніцу паміж двума войскамі. Выканаўшы ягоную просьбу, Госпад сказаў наступнае.