Такога чалавека, вольнага ад мірскіх прыхільнасьцяў, ня вабяць матэрыяльныя, пачуцьцёвыя асалоды: ён заўсёды пагружаны ў транс і чэрпае радасьць у сабе. Так чалавек, які спасьціг сваё сапраўднае «я» і заўсёды засяроджаны на Ўсявышнім, цешыцца бязьмежным шчасьцем.
Шры Ямуначар’я, вялікі адданы Крышны, казаў:
«З тае пары як я прысьвяціў сябе трансцэндэнтнаму любоўнаму служэньню Крышне і знайшоў у Ім крыніцу асалоды, якая ўвесь час абнаўляецца, толькі я падумаю пра цялесныя ўсьцехі, як вусны мае крывяцца ў агідзе і я сплёўваю». Той, хто дасягнуў узроўня брахма-ёгі, ці сьвядомасьці Крышны, так паглынуты любоўным служэньнем Госпаду, што ў яго зьнікае ўсялякі смак да мірскіх задавальненьняў. Вышэйшай формай матэрыяльнай асалоды зьяўляецца асалода сэксу. Увесь сьвет знаходзіцца ў ягоным палоне, і ніводны матэрыяліст ня стаў бы працаваць бяз гэтага стымулу. Але чалавек, які разьвіў у сабе сьвядомасьць Крышны, можа працаваць зь велізарным запалам, не імкнучыся пры гэтым да сэксуальных задавальненьняў і, больш за тое, нават пазьбягаючы іх. Гэта азнака, па якой можна судзіць пра духоўнае ўзрастаньне чалавека. Духоўнае разьвіцьцё і сэксуальныя задавальненьні несумяшчальныя. Чалавека, які валодае сьвядомасьцю Крышны, ня вабяць ніякія пачуцьцёвыя задавальненьні, бо ён зьяўляецца вызваленай душой.